Автомобилската индустрија во Европа минатата година забележа не толку солидни резултати доколку се земе предвид обемот на реализираните продажби.

Според анализите, оваа година се очекува раст од околу 13% на продажбите во земјите на ЕУ (плус Велика Британија, Исланд, Норвешка и Швајцарија).

Најголем дел од растот се очекува да биде како резултат на продажби на рентакар компании, индивидуални клиенти, како и директни регистрации од страна на дилерите и производителите.

Според ACEA (европското здружение на автомобилските производители), очекувањата се продажбата на патничките возила да забележи раст околу 5%, со што нивната бројка би пораснала на 9.8 милиони возила.

Но, важно е да се стават бројките во контекст. Имено, и доколку се остварат овие позитивни предвидувања, резултатот ќе биде продажба за 25% помала споредено со пред-пандемиската 2019 година.

Минатата година продажбите во Европа забележаа пад од 4.1%, а доколку се земат предвид само земјите на ЕУ, тој процент изнесува 4.6.

Сепак, овие бројки не се толку загрижувачки, поради фактот што најголем дел од производителите забележаа одлични профити, како резултат на давањето на приоритет на модели со повисока стапка на заработувачка. 

Ова беже нужна практика на повеќето автомобилски производители, поради недостигот на полупроводници кој ја зафати индустријата.

Последица на ова беше ситуација во која автомобилските производители беа во можност да го продадат секој автомобил што можат да го произведат.

Тоа предизвика и безмалку целосен прекин на дилерските продажни бонуси (dealer incentives), кои ќе бидат ретка појава и во оваа 2023 година, со оглед на тоа што голем дел од автомобилските производители веќе имаат нарачки за производство на возила кои се протегаат сѐ до крајот на годината.

Еден сегмент каде што се очекува забавување на растот се електричните возила. Имено, и покрај напливот на нови модели, нивните цени сѐ уште се прилично скапи, а инфраструктурата за полнење сѐ уште е во зачеток.