Со турбо моторот со 5 цилиндри, Audi RS3 веќе ужива посебен углед во сегментот на спортски компакти.

Но, производителот од Инголштат, сега додава уште еден аргумент плус во корист на својот спортски модел – максимална брзина ограничена на дури 300 km/h.

Специјалната изведба се нарекува RS 3 Performance Edition, а ќе има само 300 произведени примероци.

Но, не е само максималната брзина она што ова специјално издание го издвојува од останатите. Турбото на 5-цилиндерскиот мотор работи под притисок кој е за 0.1 бар повисок (1.6 бари), како резултат на што се добива сила од 407 hp и 500 Nm вртежен момент.

Дополнителната сила од седум коњски сили се добива малку подоцна (при 5,700rpm), додека максималниот вртежен момент е достапен помеѓу (2,250 до 5,700 rpm).

Забрзувањето од 0-100 km/h изнесува 3.8 секунди. Производителот ја подобри контролата на издувниот систем, па отсега петте цилиндри можат да испуштаа и посилен звук при стоење во место. Спортската суспензија, пак, треба да овозможи уште подобра возна динамика.

Но, RS 3 Performance Edition се издвојува од останатите и во однос на изгледот. Тука се специјалните бои Nogaro, Daytona и Sebring во комбинација со црните спојлери и црниот амблем RS 3 кој е поставен на предниот и задниот дел.

Специјалната едиција веќе може да се нарача, а испораките ќе започнат на почетокот на 2023 година.