Дел од конкуренцијата можеби делуваше поекспедитивно во процесот на зголемување на SUV понудата, но Mazda реши трпеливо да го гради концептот кој ќе претставува автомобил поставен меѓу актуелните CX-3 и CX-5.

Реалниот производ е веќе промовиран и го доби името CX-30 (Mazda веќе го користи името CX-4 со модел за кинескиот пазар), а претставува уште една дизајнерска мајсторија на јапонскиот производител кој се претплати на производство на SUV модели со уникатен стил.

Со компактни димензии и основа од компактот Mazda 3, CX-30 подразбира комбинација на робустност и купе силуета, што пак зема мал данок во однос на просторот за глави на задната клупа, како и кај багажникот со капацитет од 430 литри.

Ако некаде Mazda постојано се издвојува во однос на ривалите и успева да изнуди позитивен впечаток, тоа е ентериерот и начинот на кој ги спојува минималистичкиот концепт и квалитетните материјали. Новиот CX-30, покрај со другите квалитети, ќе ја оправдува својата цена и со уредувањето на внатрешноста како сегмент на кој Јапонците внимаваат посебно, a модерната архитектура е испреплетена со мал број класични команди, комбинација на аналогна и дигитална технологија на инструмент таблата и централен 8,8-инчен екран поставен на врвот на централната конзола.

Skyactiv архитектурата на CX-30 подразбира дека Mazda испорачува уште еден автомобил со возни карактеристики со кои ќе биде на врвот на својата класа, а овој модел ќе биде достапен и со I-Activ погонот на четири тркала. Нешто што сериозно ќе ја издвојува Mazda CX-30 од другите модели во сегментот е уникатниот Skyactiv-X мотор.

Се работи за револуционерен 2.0-литарски бензински мотор, кој во процесот на согорување го користи палењето со свеќичка само во одредени ситуации и на помала смеса, додека останатиот дел се пали под компресија како кај дизел моторите.

Mazda потенцира дека на тој начин моќта на моторот се зголемува за 10 проценти, додека Skyactiv-X моторот е поефикасен од дизел моторот и добива 30 проценти поголем вртежен момент од класичниот Skyactiv-G бензински мотор.

Ова иновативно погонско решение може да соработува со шест-степена мануелна или автоматска трансмисија, како и во „благ“ или плаг-ин хибрид изведба.

На почетокот на продажбата, Mazda CX-30 ќе биде достапна со бензински мотор со 122 и дизел мотор со 116 коњски сили, а возачот на располагање ќе има и голем број безбедносни системи и технологија со која ќе добие порелаксирани моменти зад волан.