Европската Унија ѝ нуди декларација на Германија која би овозможила исклучок и продажба на возила со мотори со внатрешно согорување во земјите на ЕУ и по 2035 година, доколку тие користат е-горива.

Со ова би се решила дискусијата и несогласувањата кои настанаа на почетокот од месецов во Брисел, кога пред финалното одобрување на веќе донесениот закон, претставниците на Германија се премислија и решија да реагираат.

Европската комисија, која е извршно тело на ЕУ, засега не излезе со конкретни информации за тоа кога официјално би го објавила предлогот, а не е сигурно и дека тој ќе биде задоволителен за владата на Олаф Шолц.

Голема е веројатноста овие новини да влезат во процедура по изборите во ЕУ кои ќе се одржат следната година.

Германскиот министер за транспорт, Фолкер Висинг, неочекувано, во последен момент реагираше на законот, кој веќе беше одобрен од страна на 27-те членки на Унијата како и од страна на европскиот парламент.

Финалното гласање, кое беше планирано за минатата седмица, и се сметаше за формалност, не се одржа поради реакцијата на официјален Берлин.