Ford, следејќи го примерот на дел од конкурентските автомобилски групации, планира дополнително намалување на малопродажната мрежа и имплементирање на таканаречениот агенциски модел на директни продажби.

Според менаџментот на Ford, дилерската мрежа во Европа е сѐ уште премногу голема и во следните години ќе следи нејзино оптимизирање.

“Севкупно гледано, нашата дилерска мрежа е преголема и ние ќе мора да ја реструктурираме”, изјави Мартин Сандер, директор на одделот за патнички возила на Ford за Европа.

Ford во Европа постепено ги напушта дел од патничките сегменти, како што се малите градски возила и компактите, истовремено фокусирајќи се на SUV модели и кросовери кои имаат поголеми профитни маржи, што во крајна линија и ја намалува потребата од голема дилерска мрежа, која беше поставена за да може да опслужи многу поголем обем на продажби.

“Идеалната малопродажна мрежа за нас би била помала споредено со оваа која ја имаме денес, но сепак, доволно голема за да ги опслужи нашите клиенти насекаде низ Европа”, додаде Сандер. Во некои земји мрежата и денес е оптимална, но дел од нив ќе мора да работат на нејзина оптимизација.

Само за илустрација, во Велика Британија, најголемиот европски пазар на Ford, американските автомобилски производители во 2021 година затвориле 25 дилерства, и уште 20 во изминатата 2022 година.

Во јули годинава, Ford ќе го произведе последниот примерок од култната Fiesta, а во истата фабрика во Келн ќе започне да се произведуваат електрични возила поставени на платформата на Volkswagen Group.