Во 2025 година премиум производителот од Минхен ќе го лансира првиот модел поставен на долго најавуваната нова платформа. Извршниот директор на BMW, Оливер Зипсе ветува дека моделот ќе постави нови стандарди во многу аспекти.

Пред-продукциското производство на првиот модел поставен на новата платформа е закажано за следната есен. Тоа беше најавено уште во јули 2022 година од страна на извршниот директор на BMW. 

Првите примероци, пак, од очекуваниот модел се очекува да пристигнат кај клиентите во 2025 година. Првиот модел кој ќе ја користи оваа платформа се очеква да биде седан со четири врати.

Првата визуелна асоцијација во однос на новиот модел беше прикажана на овогодинешниот CES, каде BMW го претстасви концептот iVision Dee. Иако според Зипсе, тоа не е баш комплетна најава на тоа како ќе изгледа моделот, сепак е некаква насока за пристапот кон дизајнот.

Извршниот директор на BMW за време на CES не штедеше зборови кога станува збор за очекувањата од новиот модел на брендот. “Тој ќе постави нови стандарди во однос на автономијата, брзината на полнење на батеријата и цената. Не ја заборавајте цената”, изјави тој за време на средба со новинарите во Лас Вегас.

BMW има големи очекувања од новите батериски ќелии, чие користење ќе започне токму со првиот модел поставен на новата платформа. Се работи за литиум-јонски батерии, кои имаат можност да користат катоди од литиум-железо фосфат.

Освен ова, BMW за време на CES го промовираше својот нов head-up дисплеј. Имено, концептот претставен на CES е без класичен екран осетлив на допир поставен на централната конзола.

Наместо тоа, BMW развива сосема нов, иновативен head-up дисплеј, преку кој на ветробранското стакло ќе се прикажуваат најважните податоци. 

Со тоа, според Зипсе, во историјата ќе заминат екраните осетливи на допир кои денес се неизбежна функционалност, иако во однос на нивното користење има многу контроверзни ставови.