Jaguar продолжува да ги подобрува карактеристиките на својот прв електричен модел, а со најновата надградба, I-Pace станува понапреден автомобил во повеќе сегменти.

Со оглед на тоа дека брзината на полнење и автономијата се многу важен фактор во однос на одлуката да се купи електричен автомобил, Jaguar презема конкретни чекори да го приближи луксузниот I-Pace до своите купувачи.

Ако досега во пакетот беше вклучен 7 kW полнач, сега купувачите на I-Pace добиваат 11 kW полнач, со што полнењето на домашна „ѕидна кутија“ се скратува до нешто повеќе од 8 часа за целосно полнење на батеријата (досег од 470 километри). Останува и опцијата за полнење на 100 kW брз полнач, каде се добиваат 125 километри досег за само 15 минути.

Во иднина Jaguar I-Pace ќе биде достапен со систем за јонизација на воздухот во кабината, со филтер кој ќе се грижи за собирање на ситни (2,5 PM) честички. Во кабината ќе биде вметнат и дигиталниот внатрешен ретровизор кој на возачот му го проектира она што го регистрира камерата на задниот дел.

Врвната технологија ќе биде претставена и преку новиот инфо-забавен систем Pivi Pro, кој дебитираше кај новиот Land Rover Defender, а сега ќе ги овозможи напредните функции и кај I-Pace.