Приказната на Jeep започнува во 1941 со легендарниот Willys MB, а низ децениите брендот си обезбеди посебно место во автомобилската индустрија, истакнувајќи ја својата специфична ДНК, чии главни карактеристики се оф-роуд потенцијалот, комфорот и функционалноста.

Jeep уште минатата година ги лансираше плаг-ин хибрид изведбите на Renegade, Compass и Wrangler како дел од одбележувањето на јубилејот, а годинава на купувачите ќе им бидат достапни примероци од специјалната серија „80th Anniversary“.

Денеска, Jeep го најави и освежениот Compass за европските пазари, а тој првично ќе биде претставен токму со специјалната изведба, по што во текот на годината ќе пристигнат и примероците со класичните нивоа на опременост.

Од она што може да се забележи ревизијата на дизајнот на Compass, тука е редизајнираната маска со препознатливите седум отвори, а овој SUV добива и нова форма на светлата и браниците.

Во кабината Jeep Compass добива пософистициран изглед, 10,1-инчен екран со најновата петта генерација на Uconnect инфо-забавниот систем, додека не се очекуваат промени во однос на понудените мотори, како и хибридниот погон на 4xe.

Специјалните „80th Anniversary“ изведби ќе бидат достапни и кај Renegade, Wrangler и Gladiator, а прв во продажните салони ќе пристигне најмалиот модел од гамата на Jeep.