Кросоверот Stonic доби надградба која пред се е поврзана со погонските единици и технологијата, бидејќи Kia реши да го задржи речиси идентичниот дизајн на екстериерот, со освежување само на LED светлата.

Во ентериерот има поголем избор за персонализација, Kia Stonic ќе добие 8-инчен екран осетлив на допир во стандардната опрема, а достапни ќе бидат и безжични Apple CarPlay и Android Auto.

Она што производителот посебно го истакнува е комбинацијата на турбо-бензинците со 48V технологија, при што Stonic како благ хибрид (MHEV) ќе комбинира помала потрошувачка со дополнителен вртежен момент и почесто деактивирање на моторот во ситуации кога движењето е овозможено и без него.

Изведбата со стартер/генератор и 48V литиум-јон батерија ќе биде достапна кај 1.0-литарските мотори со 100 и 120 коњски сили, а новитет е и „clutch-by-wire“ технологијата на шест-степениот мануелен менувач.

Во иднина и 1.0-литарскиот турбо бензинец со 100 коњски сили и 1.25-литарскиот атмосферец со 85 коњски сили ќе бидат достапни со шест-степен, наместо со пет-степен менувач.