Кросоверот со каросериска изведба која е комбинација на SUV и coupé, во последниот квартал од минатата 2022 година започна да излегува од производните ленти во француската фабрика Мулхаус, а деновиве неколку примероци пристигнаа во салонот на Еуроимпекс во Скопје.

Имавме можност одблизу да го погледнеме новиот модел на францускиот бренд во рамки на Stellantis групацијата, на чија платформа е и поставена 408-цата.

Платформата именувана како EMP2 беше развиена од страна на PSA во соработка со Toyota. Taa успешно се користи од 2013 година за моделите Citroën C4, Opel Astra и новиот Peugeot 308.

Новиот кросовер е наменет за купувачите на кои компакт сегментот не им е доволно просторен, а во исто време SUV модел не е опција која им одговара.

Со должина од 4.69 метри, Peugeot 408 е 5 сантиметри подолг од 308 SW. Од друга страна, 408 е значително понизок од 3008, Првиот е висок 1.48 метри, додека вториот е 1.62 метри.

Клиренсот од 19 сантиметри и пластичните лајсни од страните придонесуваат за интересен и модерен изглед на кросоверот.

Веројатно во 2024 година 408-цата ќе биде надополнета и со комплетно електрична изведба. Ова може лесно да се прогнозира со оглед на тоа што групацијата Stellantis веќе најави вакви електрични изведби на сестринските, DS 4, Opel Astra и Peugeot 308.

Изложениот модел кој имавме прилика да го погледнеме во салонот на Еуроимпекс беше со веќе најавениот Pure Tech 130 – бензински 1.2-литарски мотор со три цилиндри и 130 hp.

Во однос на пакетот на опрема, имавме можност да го погледнеме најавениот Allure Pack. Освен него достапни се и пакетите на опременост Allure и GT, a можни се и варијации на овие два пакета на опременост, како и GT Pack.