По сумирањето на резултатите од изминатата, турбулентна година во автомобилската индустрија, на површина испливуваат моделите и производителите кои успеаја да постигнат најдобри резултати во 2022.

Особено е интересна битката за продажби во електричниот сегмент каде освојувањето на значаен пазарен удел на почетокот на електрификацијата обезбедува подобра стартна позиција во годините што следат.

И додека Volkswagen и Tesla ја водат битката за лидерските позиции во овој сегмент со своите модели од C сегментот, интересен е фактот што Peugeot, францускиот производител во рамки на Stellantis групацијата, кој има два електрични модели во B сегментот, успеа да се најде на врвот според продажбата во овој сегмент.

Имено, Peugeot поради можностите и флексибилноста на е-CMP платформата, успеа прилично рано да лансира електрични изведби за своите модели во помалиот B сегмент. Тоа се хеџбекот е-208 и кросоверот е-2008.

Лансирањето на електрични изведби за поголемите модели во рамките на Stellantis групацијата, како што се Peugeot 308 и Opel Astra е потребно повеќе време, па нивното лансирање го очекуваме дури кон средината или при крајот на оваа година.

Но, затоа во меѓувреме, одличните продажби на изведбите на популарниот хеџбек и кросовер (208 и 2008) со мотори со внатрешно согорување, Peugeot успеа да ги капитализира и во однос на електричниот сегмент.

Па така, според Peugeot, тие успеале да продадат вкупно 76,000 примероци од овие два модела.