Процесот на електрификација веќе е реалност и во понудата на Mercedes, a германскиот производител ја информираше јавноста дека отсега ќе бидат достапни и плаг-ин хибрид изведби на А-Class (хечбек и седан) и B-Class.

Автомобилите кои користат иста компакт основа, сега ќе располагаат со PHEV погон кој подразбира комбинација на 1.33 литарски бензинец и 75 kW батерија за заеднички 218 коњски сили и максимален вртежен момент од 450 Nm. Според WLTP нормата, А250е и B250e, на чист електричен погон ќе може да поминат меѓу 56 и 69 километри, а тогаш брзината е ограничена на 140 км/ч.

Mercedes најавува полнење на батеријата со „ѕидна кутија“ (7,4 kW) за еден час и четириесет и пет минути, додека со брз полнач, батеријата од 10 до 80 проценти се полни за 25 минути.

Батеријата тежи 150 килограми и производителот вели дека ќе одземе минорен дел од капацитетот на багажникот, а автомобилите ќе имаат и специјален систем за рекуперација на дел од енергијата.