Најновиот модел на сестринскиот производител на Volvo, Polestar 4, нема да има ретровизори, ниту пак заден прозорец. Наместо тоа, возачот ќе се ориентира со помош на дигитален екран кој ќе ја проектира околината преку снимање со камера поставена на кровот на возилото.

“Отстранувањето на задниот прозорец е феноменално функционално подобрување”, изјави извршниот директор на Polestar, Томас Ингенлат.

Поради изоставувањето на задниот прозорец, панорамскиот покрив на Polestar 4 се протега сѐ до главите на патниците на задната клупа, кои може да ги спуштат седиштата во полулежечка позиција. 

Овој модел, кој производителот го дефинира како реинтерпретација на SUV со купе нијанси, ќе биде најбрзиот на Polestar, а неговото лансирање е планирано за почетокот на следната година.

До 2025, Polestar очекува овој модел да биде втор по продажба, веднаш зад Polestar 2.

Кинеско-шведскиот производител го претстави моделот во Шангај, а Кина ќе биде првиот пазар на кој ќе биде лансиран. Тој ќе се произведува во фабрика во сопственост на Geely, автомобилски гигант кој ги поседува Polestar и Volvo.