На почетокот на следната година Citroën ќе лансира кросовер изведба на добропознатиот компакт C4, именувана како C4 X.

Имено, компактот C4 кој беше лансиран на крајот од 2020 е достапен во изведби со мотори со внатрешно согорување, но и електрична изведба. За разлика од сестринските брендови во групацијата, Citroën го постави C4 на помалата CMP платформа, што овозможи производство и на електрична изведба при лансирањето.

За разлика од C4, сестринските модели Peugeot 308 и Opel Astra се достапни само како плаг-ин хибриди, нивните електрични изведби ќе бидат достапни дури во 2023/2024 година.

Споредено со C4, кросоверот C4 X ќе биде 24 сантиметри подолг, додека висината (1.53м) и ширината (1.80м) остануваат непроменети.

Практично, сѐ до средните кровни носачи компактот и кросоверот се идентични. Но, задниот дел е оној кој ја прави разликата, која особено се забележува во однос на багажниот простор. Имено, C4 X има 510 литри товарен волумен во багажникот, за разлика од C4 кој има 380 литри на располагање. 

Дури и ако багажниот простор се спореди со оној на поголемиот C5 X (545 литри во бензинските изведби/485 кај плаг-ин хибридните изведби), новиот кросовер не котира воопшто лошо.

Citroën планира да нуди бензински и дизел мотори за кросоверот со 100 и 130 hp. Но, тие нема да бидат достапни за сите пазари. Имено, во 14 земји од Европа ќе биде достапнa само како електрична изведба (ë-C4 X).

Во однос на технологијата, тука работите се веќе познати. Добро познатиот електричен погон кој се вградува и во C4 има сила од 100 kW (136 hp) и вртежен момент од 260 Nw. Во спортскиот режим на возење, компактот забрзува од 0-100 km/h за 9.7 секунди. Максималната брзина е лимитирана на 150 km/h.

Литиум-јонската батерија има капацитет од 50 kWh. Благодарение на подобрата аеродинамика C4 X ќе има нешто подолга автономија (360 км), споредено со C4 (354).

При користење на полнач со еднонасочна струја, батеријата ќе може да се наполни до 80 проценти за половина час.

И ентериерот е препознатлив од компактот. Со новиот инфотејнмент систем, кој е преземен од C5 X, ќе може да се управува преку 10-инчниот дисплеј.

Комерцијализацијата на C4 X е планирана за почетокот на 2023 година. Во моментов нема податоци за цените.