Новитети
Премиера: Nissan Qashqai добива подинамичен изглед и иновативен e-Power погон
Третата генерација на Nissan Qashqai пристигнува на нова платформа, со електрифицирани погонски единици и интересен дизајн кој сигурно ќе привлече голем број фанови на и онака популарниот кросовер.
Премиерата на Qashqai ги потврдува големите амбиции на јапонскиот производител, а овој модел останува двигател на продажните резултати на Nissan во Европа.
Дизајнерите се решиле за уште повпечатлив V облик на маската на предниот дел со хромирана рамка, како и тенки светла со бумеранг форма, за вака конципираниот Qashqai да добие подинамичен, но и поробустен изглед.
Производителот најави подобрувања на карактеристиките во однос на аеродинамичноста, но и суспензијата, при што мулти-линк потпирањето на задната оска останува за купувачите на 4×4 изведбите.
Новиот Qashqai е 3,5 сантиметри подолг од својот претходник, што овозможува и 28 милиметри повеќе простор за колената на патниците на задната клупа, a Nissan најави 50 литри поголем капацитет од претходникот.
Кокпитот на Qashqai изгледа помодерно и трендовски, купувачите ќе добијат опција за 12,3-инчна дигитална инструмент табла, 10,8-инчна хед-ап проекција, како и 9-инчен централен екран кој е поврзан со инфо-забавен систем подготвен да соработува со најпопуларните интернет и стриминг сервиси.
Бензинските изведби на кросоверот ќе бидат понудени со 1.3-литарскиот мотор кој ќе соработува со стартер/генератор и 12V батерија, што изведбите со 138 и 156 коњски сили ќе ги претвори во благи хибриди.
Интересен за возачите може да биде e-Power концептот на хибрид, кој подразбира комбинација на 1.5-литарски бензинец и електро-мотор, но разликата е што бензинскиот агрегат се користи само за придвижување на електро-моторот и полнење на батеријата, односно неговата моќ се користи само индиректно.
Вкупната погонска моќ во оваа варијација на Qashqai изнесува 187 коњски сили и доаѓа со погон на предните тркала.
Повеќе содржини за SUV модели: