Во јули годинава во Германија се регистрирани 205,911 нови патнички автомобили, што е 12.9% помалку споредено со истиот месец од претходната година. Само 10 од 36-те производители на листата бележат раст.

Имено, оваа бројка на нови регистрации е послаба и споредено со 2020 година кога започна Ковид пандемијата.

Помеѓу 10-те производители кои забележаа раст се и Polestar со 120.6% раст, Dacia со 40.4% и Tesla со 36.4%.

Најголем пад во продажбата забележаа Smart со 43.2% послаба продажба, Suzuki (-38.4%) и Jaguar (-34.5%).

Со исклучок на Porsche, производител кој забележа 3.4% раст, останатите германски производители имаат пад во продажбата.

Што се однесува до најпопуларните сегменти, SUV моделите учествуваат со 27.4% во вкупната продажба. Понатаму, и покрај намалувањето на учеството на компактите, тие сепак бележат 16.4% пазарен удел, со што се втор најпопуларен сегмент. По нив се малите возила со 12.4% пазарен удел и офроуд моделите со 11.7%.

Интересна е анализата на погонот на новорегистрираните патнички возила.

Дури 14% од нив се комплетно електрични автомобили. Со 59,962 нови регистрации хибридните автомобили заземаат 29.1% пазарен удел во продажбата. Од нив 23,712 се плаг-ин хибриди.

Уделот на моделите со бензински мотори изнесува 36%, но овој погон бележи пад од 20.5% споредено со истиот месец лани. Сличен пад во побарувачката има и за автомобилите со дизел мотори (-20.1%). Дизелите во јули годинава имаат пазарен удел од само 11.3%, што значи дека само едно од десет новорегистрирани возила има дизел мотор.