Најавените промоции на BMW и Stellantis, закажаните прес конференции на добавувачите како што се Bosch, Continental и ZF Group, сѐ повеќе прават светскиот технолошки настан да заличи на европски автомобилски саем.

По две турбулентни години во кои Коронавирусот оневозможи одржување на таков глобален настан со присуство на публика, следниот CES кој треба да започне на 5-ти јануари 2023 носи големи очекувања за организаторите, кои проектираат околу 100,000 посетители.

Но, покрај технолошките компании, таму ќе бидат присутни и дел од автомобилските производители. BMW и Stellantis ќе откријат нови електрични концепти, кои се основа за производствените планови во следните неколку години.

BMW ќе ја претстави новата “Neue Klasse” електрична платформа која ќе биде основа за производство на возила веќе во 2025 година.

Peugeot ќе го претстави Inception концептот, кој ќе ни најави во кој правец ќе се движи дизајнот на идните модели на брендот.

Се очекува извршните директори на BMW и Stellantis, Оливер Зипсе и Карлос Таварес да одржат прес конференции.

Понудата за време на CES нема да биде ограничена само на електрични автомобили. Имено, Bosch ќе претстави електричен велосипед, а вкупно се очекува 275 компании кои развиваат производи за идната мобилност да се претстават на шоуто.