Volkswagen официјално го претстави освеженото издание на бестселерот Tiguan, а веројатно најважните елементи кои ќе бидат достапни отсега се плаг-ин хибрид и спортската R изведба на овој голем SUV.

Убавата вест за докажаниот SUV доаѓа на денот во кој брендот Volkswagen и официјално има нов CEO, односно Ралф Брандштетер, промена која беше најавена пред одреден период.

По повеќе од шест милиони продадени примероци во историјата на Tiguan, тој сега е претставен со фејслифтот на актуелната генерација, кој ќе овозможи модернизиран изглед, уште повеќе технологија и поголема интелигенција.

Како и останатите автомобили од германската групација, новиот Tiguan ќе ја добие третата генерација на платформата за инфо-забавниот систем, a во однос на кокпитот тоа подразбира 10-инчна дигитална инструмент табла и централен екран кој може да биде и 9,2-инчен.

Во иднина овој SUV ќе го користи и Travel Assist системот, кој овозможува полу-автономно возење на брзини до 210 км/ч.

Tiguan дефинитивно има дополнителен број квалитети во секој сегмент, а во кокпитот покрај квалитетните материјали и премиум амбиентот, возачот добива волан со команди на допир, а нешто слично е направено и со командите за климатизацијата.

Новата спортска изведба која ќе биде позната како Tiguan R ќе биде прв избор на купувачите кои сакаат и сериозни перформанси (320 кс), а плаг-ин хибридниот Tiguan eHybrid ќе располага со 245 коњски сили и електрична автономија од околу 50 километри.