Користењето на заедничка платформа и LFP батерии му овозможи на шведскиот производител да го позиционира EX30 пониско од, на пример, електричната изведба на Opel Mokka.

Од страна на Џим Рован, извршниот директор на Volvo, новиот модел на брендот беше претставен како најевтин, но и најбрз во портфолиото на шведскиот премиум производител.

Цената во Германија ќе започнува од 36,590 евра, додека од 0-100km/h малиот кросовер ќе забрзува за само 3.5 секунди.

Оваа комбинација на цена и брзина го прави менаџментот на Volvo самоуверен дека правилното позиционирање на моделот ќе му помогне на брендот во остварување на стратешката цел – до 2025 година половина од продажбите да отпаднат на електрични автомобили.

Исто така, Volvo планира до средината на декадава да ја зголеми оперативната профитна маржа на 8-10 проценти, споредено со минатата година кога таа изнесуваше 7 проценти.

Volvo започна да прима нарачки за EX30 во Европа и САД, а испораките се очекува да започнат на почетокот на следната година.

Се нудат изведби со еден или два електрични мотори. Изведбата со два мотори ќе има погон на сите тркала и сила од 422 hp и 523 Nm вртежен момент.

За оние клиенти кои имаат потреба од поголем досег, Volvo ќе нуди изведба со еден мотор кој ја придвижува задната оска, што ќе им овозможи да поминат 480 километри со едно полнење.

Основната верзија, пак, ќе овозможува 344 километри досег со едно полнење, овозможен од помалата батерија со капацитет од 51 kWh, направена од литиум-железо-фосфат.