Пролетните пробиви на сонцето ја активираат желбата за возење под отворено небо, а кабриолетите отсекогаш биле автомобили наменети за најистакнатите хедонисти меѓу возачите.

Volkswagen ја најавува сезоната за уникатно задоволство со отворен покрив со храбриот потег наречен T-Roc Cabriolet. Успесите на малиот SUV веќе се потврдена реалност, T-Roc јануари го заврши на 13. место според продажбата во Европа, а кабриолет изведбата ќе му донесе нови фанови кои SUV трендот ќе го надополнат со атрактивната појава.

Мекиот покрив на VW T-Roc Cabriolet се отвора за 9 секунди до брзина од 30 км/ч, а германскиот производител реши да ја понуди оваа изведба со две нивоа на опременост, Sport и R-Line.

Во игра се и два мотора, поточно две бензински варијации, па понудата на T-Roc Cabriolet започнува со 1.0-литарскиот TSI со 115 коњски сили и завршува со помоќниот 1.5-литарски мотор со 150 коњски сили и можност за комбинирање со DSG трансмисија.

VW T-Roc Cabriolet располага со солиден багажен капацитет од 280 литри, а се произведува во фабриката во Оснабрик, во друштво на Porsche 718 Cayman.